ال "مش" فتنة طائفية بقلم ستيتة حسب الله الحمش
في نفس اليوم الضهر كان هناك عشر وقفات احتجاجية مختلفة أمام مجلس الوزراء
ناس طهقانة قرفانة زهقانة مش لاقيين ياكلوا
ومع هذا لم تظهر اسلحة من جانب المتظاهرين ولا مركبات عسكرية من جانب الحاكمين
وقبلها خمسين ستين سبعين مظاهرة
وقبلها ثورة من يوم ما بدأت فغرنا فاهنا دهشة
لأن دور العبادة أصبحت آمنة رغم الفراغ الأمني
والفتنة الطائفية نائمة رغم الفراغ الدستوري والفراغ المالي والفراغ القراري
والمسيحين نازلين مظاهرة زي كل المظاهرات
ويقيني أنهم غير مسلحين
مين ها يجيب أمه وخطيبته وعياله ويضرب نار
ومن إمتى المصري العادي بيضرب نار
وليه ها يضرب نار
وعلى مين ها يضرب نار
ومظاهرتهم معلومة المكان والزمان من قبلها بأوان
وجاء الخفافيش الموجهِين والموجهَين
اللي دايما يظهروا قبل وبعد الثورة
ويسيرهم نفس الشبوكشي
وضربوا على المركبات العسكرية والعسكريين نار
وبعدها ظاطت
لكن تظيط لدرجة تسوية ناس بالأرض؟!!
المسيحين نازلين مظاهرة زي كل المظاهرات
أخطأ من حولوا مبنى عمارة لكنيسة؟
طب ما المصريين قبلي وبحري بيبنوا مخالف بشكل شرس على الأراضي الزراعية
وبيعلوا عمارات مخالفة في كل أحياء مصر
وبيعملوا عمايل مهبولة توضح تربية "إخطف وإجري" و"ألحق لك صابونة" و"نضف شقتك وإرمي الزبالة تحت.. ده مش بيتك"
مين اللي يتخذ موقف؟
حكومة بسكوتة؟ ولا شيخ جامع يهيج جماهير ضد مبنى؟
والمبنى غلط؟
طب فين قانون تنظيم بناء دور العبادة الموحد؟
فين أي قانون أو أي حل لأي مشكلة بسيطة كانت أم عويصة؟
ومحافظ يطلع يقول مبنى بيتبني غلط وأهالي القرية بيصححوا الوضع؟
مفروض أشتمك.. بس أشتمك منفرد ليه.. إنت جزء من نظام تسبب في إنهيارنا ويرغب أن يكمل مخطط تقسيم مصر بغباءه ووجوده على كرسي أكبر منه ألاف المرات
المسيحين نازلين مظاهرة زي كل المظاهرات
وعليهم ضغوط متزايدة
وخايفين من قادم متطرف - كلنا خايفين منه - ونحن لسنا مغايرين
خايفين من هرتلة برهامي ونظرة الزمر ومحاضرات صفوت حجازي
اللي بيقول مات الملحدين في الثورة علشان الثورة تعلو بالشباب المسلم
فقرر أن الشهداء بينهم ملحدين
كشف عليهم عند مالك خازن النار وتثبت أنهم من أهلها
خايفين من اللي محاضراتهم تنضح بالكراهية والوعيد
ثم بعد تفاقم الأحداث يطلعوا يقولوا السلفيين ها يحموا المريناب
خايفين من اللي في وقت السلم الثوري نعطيهم بوق ينعروا فيه ثم ساعة الخطر الثوري يجروا يبرؤا ساحتهم وهم أساس كل هيجان
خايفين يكونوا كلهم الصبح شقة العجوزة
اللي فيها خمرة ونسوان وستة شباب وكان ناقص يذكر وأد البنات علشان نشوف مشهد من فيلم فجر الإسلام وما هذا يا حنظلة وألا تستحم يا رجل؟
خايفين من تحالف ديمقراطي من أجل الديمقراطية وكتلة مصرية وإئتلاف شباب مش متآلف ومشهد من أعجب المشاهد
أتفهم أن نتكتل لنرفض الظلم
لنكمل ثورة
لنضع دستور وطني توافقي
لكن نتكتل من أجل إنتخابات؟
كيف يتكتل عمرو حمزاوي مع الكتاتني مع طارق الزمر
يعني أنزل انتخب حمزاوي لأني مقتنعة بمباديء حزبه الليبرالي - مثلا - ألاقي على القائمة الموحدة طارق الزمر قاتل المصريين ومفجر قنابل المسامير في صدور المواطنين؟
ألا تعقلون؟
خايفين من انتخابات لا أمل أن تكون نزيهة وبرلمان لا أمل أن يكون طبيعي ورئيس لا أمل أن يكون مستقل
المسيحين نازلين مظاهرة زي كل المظاهرات
يعبروا عن خوفهم .. عن غضبهم لعودة هدم الكنائس .. عن حقوقهم اللي خايفين أن تهدر
كلنا خايفين
زي أي مظاهرة
زي كل مصري
مكنش في حسبانهم أن يخرج لهم بلطجية
وإن البلطجية ملقوش دولة قانون
وإن المصالح كلها تتصالح
وإن قانون الغدر لازم ميطلعش
وإن فلول الوطني بتهدد علانية بلا خشية أو خوف "لو خرج قانون الغدر ها نولعها"
وإن التلفزيون المصري يدعو المصريين للنزول لحماية الجيش من المسيحين!!
وإن الفلول .. البلطجية - سميهم واي سميهم زد - يطلعوا تاني يهتفوا اسلامية اسلامية!! والمسيحين فين الإسلام أهوه!!
ومصر بلد عنصرية
ونمت في تربتها الطائفية
تعترف ماتعترفش مشكلتك
اركب ميكروباص واسمع عن تأديب المسيحين اللي اتجننوا وهم أقلية
إفتح الفيس بوك وشوف القيء اللي ها ينط في وشك
وطالما لا يوجد قانون يعلي المواطنة والعدالة الإجتماعية والمساواة
يبقى وضع حسني زي وضع حسين زي وضع موسى أو حسنين
ومصر مش في مؤامرة واحدة خبيثة
مصر يتأمر عليها بلاد بره
وفلول جوه
وطامع في حكم عسكري
وطامع في برلمان ديني
وطامع يخرج زي الشعرة من العجين مع الإحتفاظ باللسان والمخ والسمين
وطامع في ثورة تمت .. فلما تمت إنزهلنا ولم نعرف ماذا نفعل بعدها
وطامع في حتة تورتة حمضانة بعد ما كان بيلتف في الشارع علشان يعرف يمشي
كل ده وأنا مالي
المسيحين نازلين مظاهرة زي كل المظاهرات
ينبغي أن تؤمن من "حماة" الوطن ولن نبرر دخول بلطجية في النص
ينبغي أن يتواصل "حماة" الوطن مع منظمي المظاهرة من قبلها لوضع خطة تأمين
بل ينبغي أن يسرع "حماة" الوطن في ردود الأفعال السلحفائية الطابع وعزل المسئولين الغير مسئولين علشان متطلعش مظاهرة أساسا وكلنا نطمئن إننا مش رايحين على ظلام وجاهلية
بل ينبغي أن يكون "حماة" الوطن أساسا حماة وطن مش تهيئات وتخيلات وإلصاق وطنية بغير أهلها
كل ده وأنا مالي
مصر محتاجة مسئول واحد مسئول
صادق وصريح
لا بتاع عجلة ولا استقرار ولا كلام مجعلص ولا اتهامات لشباب بلا بينة
لا بتاع مصر خزانتها خاوية ولا استحالة نضع حد أعلى للأجور ولا الصراحة راحة ياروحي وانت مبتعرفش
مين يبرر إن عيال وطني يموتوا وتتكسر عظامهم تحت المركبات الثقيلة
ومين يبرر المصابين من العساكر المضروبين المأمورين
والمسيحين المسالمين الغاضبين
والمسلمين المتضامنين الواعيين
والمدنيين ذوي الحقوق المتلخبطين
والبلطجية القابضين المُسيَرين؟
ومين يبرر الدم المصري الغالي؟
حكومة بسكوتة؟ وزرائها حزب وطني وأنا عاملة نفسي نايمة؟
مجلس - إن تكلمنا ولم نذكره في كل بلوة- نكون خايفين وغير منطقيين وبنستعبط؟
والمسيحين نازلين مظاهرة زي كل المظاهرات
مصريين زي كل مصري نزل يطالب بلقمة عيش.. بأمن .. بحق حتى وإن لم يكن وقته.. بحق حتى وإن لم تتفق معه
فكيف نبرر قتلهم؟
ها نقابل ربنا إزاي لو لم نتبرأ من قتلة المصريين؟
عزيزي البلوجاتي الحصيف
ولو وجدت إنهم يستاهلوا
وإن الناس معندهاش أسباب ولا مبررات للغضب
ولو إتهمت كل اللي نازل شوارع مصر إنه عميل بأجندة
أو عيل مش فاهم
أو من رواد شقة العجوزة
أو من دعاة تقسيم مصر
ولو إتهمت المغاير أنه لا يحب مصر زيك ولا شرب من نيلها زيك ولا لعب كورتها الشراب وأكل طعميتها بزيت العربيات
حقيقي أعزيك في إنسانيتك ومصريتك وتكون محتاج دكتور نفساني
إنا لله وإنا إليه راجعون
اللهم أجرنا في كل هذه المصائب المتتابعة وأخلفنا مسئولين يخافوك ويخشوك ويصلحوا ذات بيننا بالقانون العادل
بقلم ستيتة حسب الله الحمش
أرسلت بواسطة
رابط html مباشر:
التعليقات: