مقطع من ديوان "سيدنا طه المسيح" للشاعر الشاب ناظم نور الدين

مقطع من ديوان

"سيدنا طه المسيح"

للشاعر : ناظم نور الدين  



مينا ما جاش ؟
لسه ما جاش
كان نازل بدري ومتغداش
كان نازل يجري
رايح لحبيبته
المحجوزة ف الإنعاش
كان واخد قلبه ف ايده
وشايل على ضهره شنطة أيام
لسه ما عاشهاش
لسه ما جاش ؟
لا لسه ما جاش
كان فاطر طعم الغربة
ف ربع رغيف أسود محروق
وبقاله تلت تيام
مطبق حزنه
ف عينه وصاحي
قاعد بيفكر ف اللي بتنزف ف المستشفى
وبسرعة لم حاجاته ف روحه المش لاحقاه
حتى محفظته نسيها ف درجه
وما خدهاش
لسه ما جاش ؟
لا لسه ما جاش
اتاخر زي عوايده
وسابني اتعشى حنينه لوحدي
الواد الفقري النقري
الغاوي اعتصامات
هيموتني ناقص عمر
لا يقولوا ده مات
والاقيه كل يومين جاي مربط
قطن وشاش
لسه ما جاش
لا لسه ما جاش
الواد مينا
زي البحار التايه بلا مينا
زي اللي بيتعلم لسه يقول أسامينا
واقوله أتهد يقول ما تخفش
يا عم الجيش جيشنا بيحمينا
أقوله يا مينا
يقولي دي أيادي أمينة
ويعني الجيش لو طاح فينا
متخافش الرب اللي حامينا
مجد سيدك متكبرهاش
لسه ما جاش ؟
لا لسه ما جاش
أحلامه الاتقل من كتفه المحني
لسه مهاوداه
الواد ده بيكبر كل شوية ف نظري
كل ما يكبر قلقي عليه
وكل ما يتعب قلبي معاه

هفضل اصلي واستناه
انشالله لوش الصبح ماجاش
مينا ما جاش ؟
مينا ما جاش
مينا سابنا ف مواتنا
وعاااااااااش