الكلام عن مأساة دهشور مايفرقش

كتب محمد الطنانى

الكلام عن مأساة دهشور مايفرقش لسببين..أولاً ان اضطهاد غير المسلمين عموماً والمسيحيين خصوصاً في مصر بقى شيء عادي جداً ودوري ولو عدى شهر من غير فتنة طائفية الواحد يقلق عالبلد..السبب الثاني ان المصريين اختاروا انهم يعيشوا مأساة دهشور لما اختاروا الدولة الدينية في صندوق الانتخابات..الدولة الطائفية قائمة في وجدان كل مصري قبل ماتكون قائمة على ارض الواقع..لو عندك أدنى قدر من الأمانة اسأل نفسك هل فعلاً ان
ت كمصري مسلم سني مابتكرهش المسيحي وبتتمنى انه يتهجر من أرضه ويحل عن سماك؟ بلاش..مابتكرهش البهائي أو الملحد وتتمنى انهم مش بس يتهجروا من بيوتهم لأ كمان يولعوا بجاز؟! بلاش..ده انت حتى بتسب وتلعن وتتمنى الموت للمسلم اللي زيك لو كان شيعي! الموضوع خلصان والمصري طائفي بطبعه وأي كلام تاني يبقى عبث..اي تبرير "أهطل" للي حصل وبيحصل وهيحصل هو برضو عبث! حتى جمل مبتذلة زي "دول مابيمثلوش الاسلام..دول مش مسلمين اساساً..انا والله عندي اصحاب مسيحيين كتير" بقت كلمات تافهة كاذبة طالما مالهاش اي ترجمة حقيقية على ارض الواقع..لازم نفوق ونعترف ان احنا كدة..احنا متنيلين بستين نيلة وأسوأ خلق الله! يا اخي ده انت مش حتى كمان بتكره المسلم الشيعي اللي زيك ده انت بتكره المسلم السني كمان لو مكانش على دينك السياسي! شوف كام واحد اتهان واتسب واتكفر لما انتقد مرسي..مجرد انتقاد! كفرتوا المسلم السني العلماني والليبرالي واليساري او اللي مالوش في اي حاجة ومش عاجبه الاخوان المسلمين والسلفيين! للاسف مفيش مريض نفسي بيشوف انه مريض، وتلاقيه على طول فاكر نفسه "ميت فل وعشرة" وده حالنا بالظبط مع كل فتنة طائفية..بنلجأ دايماً للانكار ونقول "لأ دي مجرد حادثة لا تعبر عن تماسك النسيج الوطني المصري وعن الوحدة الوطنية بين المسلمين والمسيحيين" الى اخر هذا الكلام العبيط المنافق! احنا مرضى نفسيين..الأديان المفروض "المفروض يعني" بترقي وجدان الناس وتخلي في سمو اخلاقي بس ماعرفش احنا لما بنتدين اخلاقنا بتنحدر للحضيض ليه! ده لو لسة موجودة اساساً، وقلوبنا ووجداننا بيبقوا مليانين بالحقد والغل والكراهية لكل ماهو مخالف ومختلف عن ديننا، وبنتحول لمجموعة من المجرمين الارهابيين..شوية بصورة مباشرة عن طريق المشاركة في اضطهاد-حرق-قتل-ذبح-تهجير غير المسلمين..والباقي مشارك في الجريمة بصورة غير مباشرة عن طريق الانكار والسكوت والطرمخة المعتادة! مفيش فايدة وكل الكلام في المواضيع دي عبث بما فيهم كلامي ده..وعلى كل متضرر انه يلاقي الحل اللي يريحه..اللي عايز ياخد حقه بإيده يتفضل طالما دولة القانون انتهت وطالما رئيس الجمهورية المحترم بيفرج عن القتلة والارهابيين اللي قتلوا المصريين في التسعينات! خلاص هي بقت كدة وانتوا اخترتوا كدة في صندوق الانتخابات! وبرضو اللي عايز يهاجر ويسيب البلد كلها بدل ما يهاجر ويسيب قرية او مدينة فيتفضل برضو وعلى رأيي مشايخ الرحمة والمحبة "الباب يفوت جمل" مش قالولكم كدة من سنة ونص وقت الاستفتاء؟ الحلول كتيرة والله بس انسوا "بمعنى انسوا" ان هيبقى في حل يرضيكم او يرضي اي حد محترم عنده امل في دولة محترمة..لأن المصريين صوتوا ضد الدولة المحترمة بدل المرة تلاتة!..يا عم المصريين عايزين نواب شعب بتوع ربنا..حتى لو طلعوا بتوع علاقات عالطريق الدائري او طلعوا كذابين وجهلة مش مشكلة المهم انهم بيصلو! يا عم المصريين عايزين رئيس بيصلي! مش مهم بقى هو ناجح ولا فاشل..مش مهم انه مش عارف ياخد اي قرار غير قرار التصوير في كل ركعة بيركعها..مش مهم انه ماخدش غير قرار الافراج عن الارهابيين وقتالين القتلة ورامي بقية المصريين الشرفاء في السجون! المهم انه بيصلي! والمصريين لا عايزين دولة قانون ولا دولة مدنية ولا مساواة بين المسلم وغير المسلم ولا حرية عقيدة ولا حريات عموماً ولا نيلة..هما عايزين رئيس بيصلي عشان ربنا يديلهم حسنات ويخشوا الجنة في الاخر..تفكير مريض؟ ليس على المريض حرج..وهي دي بلدنا وهما دول ناسها..شوفولكم اي حل بقى الا الاحلام الوردية العبيطة بتاعة مصر للمصريين ومصر للجميع والدولة المدنية والمساوة والحرية..الحل الوحيد اللي هيرضي المصريين هو هجرة المسيحيين والبهائيين واليهود واللادينيين والملحدين والعلمانيين واليساريين والليبراليين والمسلمين الشيعة والمسلمين الصوفيين عشان يرتاح المصري المسلم السني "الوسطي" من أي شبهة اختلاف والعياذ بالله..وساعتها برضو هيخلصوا على نفسهم! في أي دولة محترمة الاختلاف ثراء! أما في مصر فالاختلاف خراء!